Engjëjt në mes nesh

Më ndodh ndonjëherë që edhe kur nuk kam përgjigje adekuate të mos hezitoj të them diçka të logjikshme në lidhje me temën që më është shtruar. Por, më ndodh edhe të përpëlitem e të mos flas kush e di se çfarë kur pyetjet më bëhen nga më të vegjlit. Djali im, por edhe ish-nxënësit e mi, në të kaluarën kur punoja mësimdhënës, jo rrallë më kanë sfiduar me pyetje prej më të ndryshmeve e për të cilat, përgjigjet nuk janë aspak të lehta për t'iu dhënë. Janë pyetje që më së paku janë të paramenduara, burojnë në mënyrë spontane nga mendjet e tyre të shëndosha, e pa drojë për ndonjë qortim apo ndëshkim. Ata nuk ngurrojnë të bëjnë edhe ndonjë konkluzion logjik. E si t'u përgjigjesh këtyre shpirtrave të pa djallosur? Të duhet ndjeshmëri e zhvilluar ndaj tyre. Ndodh që duhet t'u lajthitësh paksa të vërtetave vetëm e vetëm që mos të lëndosh paqen e botës së tyre fëmijërore. Si t’u tregosh krejt të vërtetat e kësaj bote, jo rrallë të pakapshme edhe për mendjet e shëndosha të të rriturve. 

Djali im më pyet pothuajse për gjithçka që atij i duket interesante. Unë e inkurajoj të mos resht të bëj pyetje, por jo pa bërë së paku një përpjekje të lehtë për të zgjidhur vetë enigmën. Pyetje, që jo rrallë marrin përgjigje paksa më të ndryshme apo më të plotësuara nga ato që i ofrohen në libër apo shkollë. Pyetje nga lëndët, histori, edukatë qytetare, njeriu dhe natyra etj., ndërsa temat nga më të nxehtat, si prejardhja e shqiptarëve, luftërat e Skënderbeut e deri te lufta e fundit në Kosovë, struktura dhe raportet ndëretnike të vendit tonë, feja dhe Zoti, krijimi i tokës dhe gjithësisë, njeriu dhe bota shtazore e bimore dhe raportet në mes tyre, e deri te matematika dhe të panjohurat e kësaj lënde. Si t’i shpjegosh lehtë e qartë dhe pa prishur balancën e qetë të botës së tij, por pa lajthitur shumë nga e vërteta e plotë. Shumë koncepte kurrë nuk i mësuam nëpër shkolla. U deshtë pastaj të hulumtojmë vet. Shumë koncepte ende nuk kanë marr përgjigje përfundimtare as nga shkenca moderne. Shume histori ose nuk janë thënë te plota ose tek pritet te shkruhen. Ajo qe unë nuk hezitoj t’i them djalit tim është se gjithçka për të cilat ne flasim u krijua nga një krijues. Ai krijues është Zoti!

Është Zoti që në mesin tonë sjell engjëj, pra, fëmijët tonë. Ata që na pasurojnë jetët tona më shume se kushdo dhe çfarëdo tjetër. Ata që edhe gërhitja e tyre në gjumë na vjen si melodi. Ata që edhe kur djersinë dhe baltosen nga loja i përqafojmë pa gërditje. Ata që sa herë t’i dëgjojmë në turmë na ngazëllejnë shpirtrat tonë më fuqishëm se orkestra më e mirë muzikore. Ata që edhe pse pa skenar të shkruar na bëjnë jetët tona edhe me sfiduese e dinamike më mirë se cilido film hollivudian. Ata që na gëzojnë aq shumë me përparimet e tyre sado modeste sa lumturohemi më shumë se sa për të arriturat me kapitale tonat. Pra, engjëjt janë mes nesh. Mos lëndoni engjëjt! Mos lëndoni të ardhmen e botës, të gjithë ju, o njerëz, kudo që jeni. Mos bëni që engjëjt e sotëm nesër të jenë duke ecur rrugës së djallit. Mos e përsëritni historinë që ju ka ndodh ju, sado e vështirë të këtë qenë. Jepuni fëmijëve lumturinë, buzëqeshjen dhe gëzimin. Fillo nga tash, vazhdo edhe nesër dhe çdo ditë!

Zgjedhjet në Kosovë

Prej pasluftës në Kosovë u organizuan disa zgjedhje, në nivel komunal si edhe në atë qendror. Kujt nuk i kujtohen zgjedhjet e para, në të cilat radhët për të votuar e kështu për të kryer obligimin qytetar dhe të drejtën kushtetuese, ishin pa fund. Gjasonte me festë. Për herë të parë populli përcaktohej se kujt t'ia besonte drejtimin e vendit. Tjetër për çfarë do të mbahen në mendje zgjedhjet e para:

- fitorja absolute e Rugovës dhe humbja jo pak befasuese e krahut të luftës; 

- krijimi i parë i qeverisë qendrore nga tre subjektet kryesore, duke mos lënë fare opozitë;

- diskriminimi pozitiv për pakicat (krejt me hile dhe i pashembullt për demokracitë e avancuara);

- të qenurit ditë pushimi, të hënëve, menjëherë pas zgjedhjeve, nga droja e përplasjeve nga taboret kundërshtare, etj.

Pas vdekjes së Rugovës dhe shkapërderdhjes së një pjesë të elektoratit të LDK-së, numri i votuesve pjesëmarrës kishte rënie të dukshme. Kështu, pati një memorandum mirëkuptimi nga subjektet kryesore politike që zgjedhjet të pranoheshin për të vlefshme edhe nëse numri i votuesve nuk kalon mbi 50%. Kjo marrëveshje natyrisht pos që ishte anti-demokratike, dëshmonte se subjektet politike nuk kishin arritur të ngjallnin aspak interesim por as besim tek votuesit.

Pa dëshirën për kritikë për të metat e sistemit të pareformuar zgjedhor, edhe zgjedhjet e radhës nuk shpresohet që do të sjellin shumë të mira për njerëzit këtu, jo vetëm për faktin se akterët kryesorë të skenës politike janë po ata të njëjtit, por se shumica e subjekteve poltike nuk kanë parime dhe programe të orientuara dhe të qarta politike. Vet fakti se koalicionet i lidhin në ditët dhe minutat e fundit por edhe se janë të hapur për çfarëdo kombinimi, dëshmon se atyre nuk iu intereson shteti dhe zhvillimi tij, por pushteti dhe interesat e ngushta personale apo klanore. Me pak dallime, pothuajse të gjithë janë provuar duke qenë në pushtet, dhe krejt çfarë kanë arritur ata është rritja enorme e pasurive së tyre. 

Sido qe të jetë, populli edhe kësaj radhe duhet besuar në forcën e së drejtës së tij për votë duke dalur në numër të madh për të votuar, ndërsa partitë të zotohen se do t'i pranojnë rezultatet e zgjedhjeve. Fituesit, por edhe humbësit, të kthjellën dhe të punojnë vetëm për të mirën e vendit dhe njerëzve këtu, pasi që koha po kalon për të mbajtur gjallë gatishmërinë e këtyre njerëzve për të qëndruar në Kosovë e për të mos kërkuar medeomos shpresën duke ikur nga këtu.

Me fat Kosovë!

Prishtinë, 18.05.2017

Bardh (Ukë) Nitaj (monografi)

Bardh (Ukë) Nitaj

(6 maj 1919 – 8 dhjetor 1995)

Bardh Nitaj u lind më 6 maj 1919, në fshatin Dranoc të Vokshit, komuna e Deçanit. Rrjedh nga një familje fshatare, me vlera të larta kombëtare.

Bardhi, shkollën fillore e kreu në Deçan. Vazhdoi mësimet në gjimnazin e Pejës, por për shkak te pjesëmarrjes se tij ne lëvizjen e rinise përparimtare u përjashtua nga ky gjimnaz si nxënës i klasës se II-te. Bardhi mësimet i vazhdoi ne Gjakove ku i kryen 3 klase qytetëse te shkollës se mesme.

Gjate kohës se okupacionit nazifashist Bardhi, ishte pjesëmarrës aktiv ne rezistence. Në mes tjerash, si i ri që ishte, bëri edhe përcjelljen e ilegaleve-delegatëve për në Malësinë e Gjakovës, ku ne Bujan (me 31 dhjetor 1943 e 1 dhe 2 janar 1944), u mbajt Konferenca e parë themeluese e Këshillit Nacional Çlirimtar për Kosovë dhe Rrafsh të Dukagjinit. Angazhohet në Brigadën e 25-të Shqiptare të Malësisë së Gjakovës, si luftëtar i saj.

Ne fillim te vitit 1945, ne Pejë Bardhi vijoi një kurs tremujor sanitar. Pas kryerjes se kursit, Bardhi u caktua te punoje si infermier sanitar ne Deçan, me ç’rast kreu detyra me rëndësi për shëndetin e popullatës, e cila ishte kapluar nga sëmundje të ndryshme si pasoje e luftës dhe skamjes qe mbretëronte. Ne korrik te vitit 1945, Bardhi emërohet referent sanitar ne Këshillin Popullor te Vendit në Deçan. Po në këtë vit, Bardhi bashkë me mësuesin Ramë (Shaban) Alaj themeluan shkollën fillore në fshatin e tyre të lindjes Dranoc, ku edhe punuan gjate vitit shkollor 1945/46.

Në të njëjtën kohë, Bardhi me shokët nga kursi sanitar i vazhdojnë mësimet në gjimnaz dhe kështu gjer në qershor të vitit 1946, kur shokët e arsimit të krahinës në krye me profesor Zekerja Rexhën i nxorën nga gjimnazi dhe i dërguan në kurse pedagogjike që të aftësohen për mësues. Kështu, Bardhi, prej 15 korrikut deri me 30 shtator 1946 ne Prizren kreu Kursin e Ulët Pedagogjik. Me 14 tetor 1946 Dega e Arsimit e Këshillit Popullor Rajonal për Kosove e Metohi, ne Prizren, me vendimin nr. 11.706, emëron Bardh Ukën, mësues ne fshatin Mulliq, te Këshillit Popullor të Vendit në Batushë, Rrethi i Gjakovës. Bardhi, në Mulliq, themeloi shkollën fillore “Jahë Salihu”, ku punon si mësues dhe drejtor, një vit të plotë shkollor. Në ndërkohë, Bardhi vazhdonte mësimet me korrespondencë, në Gjimnazin e Pejës. Prej 1 korrikut deri me 30 shtator 1947, ne Prizren, Bardhi kreu edhe një kurs tjetër, Kursin Tremujor Pedagogjik. 

Prej 26 tetorit 1947 e deri me 2 maj 1949, iu deshtë te shërbej ne Armatën Jugosllave në Mostar. Këtu, Bardhi kreu Kursin nënoficer sanitar 6 mujor, prej 1 prillit deri me 1 tetor 1948. Gjate shërbimit ne ushtri, u gradua ne Rreshter te Klasës së I-rë. Po ashtu, gjatë shërbimit, në vitet 1948 – 1949, Bardhi vijoi dhe përfundoi shkollimin e rregullt ne Shkollën e Mesme te Medicinës ne Sarajevë, me sukses te shkëlqyeshëm, me ç’rast u kualifikua Ndihmës Mjeku. Si nxënës i kësaj shkolle, ishte angazhuar edhe në procesin e mësimdhënies, për lëndën e Matematikës.    

Një takim me Mehmet Gjevorin, në Sarajevë, inspektor krahinor i arsimit, ishte vendimtar që Bardhi, të braktisë rrugën e studimeve aq të dëshiruara në fushën e mjekësisë, e ti kthehet profesionit të shenjtë të mësuesit të popullit nga i cili nuk u nda më asnjëherë.

Me vendimin nr. 41.218 te organeve kompetente te arsimit, Bardhi u emërua me detyre ne fshatin Ponashec te Rrethit te Gjakovës, ku punon prej 6 majit deri me 1 shtator 1949, ne shkollën fillore “Ganimete Tërbeshi”, si mësues dhe drejtor shkolle. Në ndërkohë, prej 1 korrikut deri me 30 shtator 1949, Bardhi kreu Kursin e Naltë Pedagogjik në Pejë, me ç’rast dha provimin e pjekunisë për mësuesi. Gjatë tërë kësaj periudhe kohore, por edhe më vonë, Bardhi ushtroi edhe një varg funksionesh të rëndësishme në Rrethin e Gjakovës.

Prej 1 shtatorit 1949 e deri me 1 shtator 1950, Bardhi kthehet serish ne Dranoc, ne shkollën fillore “Sylë Alaj”, si mësues dhe drejtor. Prej 1 shtatorit 1950 e deri me 1 shtator 1953, me vendimin nr. 18.796, të organeve arsimore të Rrethit të Gjakovës, angazhohet të themelon Gjimnazin e Ultë (progjimnaz, shkallë e ultë e shkollës së mesme, shkollë katër vjeçare)(me vone shkolla fillore “Drita”) në Gramaçel, kurse prej 1 shtatorit 1953 e deri me 1 tetor 1955, transferohet në Gjimnazin e Ulët (më vonë shkolla fillore “Kultura”) në Irzniq. Në të dy këto shkolla pos si drejtor, punoi edhe si mësues. 

Në vitin e rasformimeve të rretheve dhe krijimit të sistemit komunal, Bardhi emërohet Referent për Arsim e Kulturë në Këshillin Popullor të Komunës së Deçanit, ku punon prej 1 tetorit 1955 e deri me 31 gusht 1956. Kontributet e tij, ne këtë periudhe ishin te panumërta, derisa ra ne konflikt te hapur me kryetarin (serb) te komunës, kur Bardhi kundërshtoi zbatimin e vendimit për suprimimin e klasave te larta te shkollës tetëvjeçare – mësimi ne gjuhen shqipe, me ç’rast edhe arriti te pengoje zbatimin e këtij Vendimi, i marrë nga Pleqësia e Arsimit te Komunës se Deçanit. Si refleksion i kësaj, Bardhi pati mjaft vështirësi ne studimet me korrespondence qe ne te njëjtën kohe i ndiqte ne Shkollën e Larte Pedagogjike ne Nish, ne degën histori-gjeografi, ne te cilën shkolle u diplomua ne shtator 1957, ku u kualifikua arsimtar i tetëvjeçareve dhe gjimnazeve te ulta.

Prej 1 shtatorit 1956 e deri me 30 shtator 1972, Bardhi punoi ne shkollën fillore “Bratstvo” ne Deçan, si arsimtarë i historisë dhe gjeografisë, ndihmësdrejtor dhe ne fund edhe drejtor i shkollës. Paralelisht me punën, Bardhi vazhdonte studimet me korrespondence, ne Fakultetin Filozofik ne Shkup, grupi Histori, ne te cilin u diplomua ne shtator te vitit 1972, e kualifikua Profesor i Historisë. Po ashtu, Bardhin e shohim ne seminare dhe simpoziume shkencore nga fusha e historisë, me ç’rast dallohet me temat nga Historia e përgjithshme e kohës me te re. Janë te njohura punimet e tija shkencore: “Mehmet Ali-Pasha Misirliu dhe Egjipti ne gjysmën e pare te shekullit XIX”; “Kemajl Ataturku, themeluesi i shtetit modern turk”, etj.     

Që nga viti shkollor 1958/59, me angazhimin e tij, në Deçan, u hapen paralelet e ndara, të shkollave të mesme ekonomike dhe bujqësore, të gjimnazit dhe të shkollës normale të Pejës, vetëm për klasat e I-ra dhe të II-ta, përderisa për klasat e III-ta dhe të IV-ta, duhej vazhduar ne Pejë apo Gjakovë. Mësimet për këto paralele të ndara, mbaheshin në lokalet e shkollës fillore. Bardhi, njëkohësisht angazhohet në mësimdhënie në këto paralele.

Paralelisht me punën në arsim, Bardhi ushtroi edhe një varg funksionesh të rëndësishme në Komunën e Deçanit e më gjerë. Ishte deri në pensionim, delegat në Kuvendin Komunal të Deçanit, anëtar dhe disa herë udhëheqës i organizatave të ndryshme shoqërore-politike, në nivel komunal dhe të Kosovës, si në organizatat e luftëtarëve, kryqit të kuq, ato shëndetësore etj. Ishte sekretar i parë i Fondit komunal për arsim e kulturë, si dhe sekretar i parë i Bashkësisë komunale të Arsimit. Gjatë kësaj kohe u arrit, të ndërtohen objekte të reja shkollore në Deçan dhe në fshatrat tjera të komunës. Gjatë viteve 1969-1974, ishte deputet i Kuvendit të Kosovës, në dhomën arsimore-kulturore. Është kjo periudha e aprovimit të amendamenteve kushtetuese si dhe e Kushtetutës së vitit 1974, si dhe po ashtu e themelimit të shkollave të larta e fakulteteve dhe e Universitetit të Prishtinës, me ç’rast kontributi i Bardhit ishte i konsiderueshëm.

Me iniciativën e Bardhit, si delegat në Kuvendin Komunal, në vitin 1967, u themelua Gjimnazi i plotë në Deçan. Bardhi ishte emëruar edhe kryetar i Komisionit amë për themelimin e gjimnazit. Gjimnazi “Vëllezërit Frashëri”, filloi nga puna në vitin shkollor 1967/68, në objektet e shkollës fillore, me gjithsej 167 nxënës (12 vajza). Bardhi angazhohet si mësimdhënës, paralel me punën në shkollën fillore. Angazhimi i Bardhit ishte vendimtar, që në vitin shkollor 1972/73, gjimnazi të nis punën në objektin e ri.

Prej 1 tetorit 1972, Bardhi kalon përfundimisht në gjimnaz, ku punon deri më 31 tetor 1981, fillimisht si mësimdhënës i historisë, pastaj zëvendësdrejtor, ndihmësdrejtor dhe në fund edhe drejtor prej 20 nëntorit 1978. Kontributi i bacës Bardh, në rritën dhe zhvillimin e kësaj qendre arsimore, ishte i jashtëzakonshëm. Gjimnazi i Deçanit, me vite ishte shpallur ndër më të suksesshmit në Kosovë e jashtë saj. Kështu, në vitin shkollor 1980/81, gjimnazi numëronte mbi 2300 nxënës (700 vajza).

Demonstratat e vitit 1981dhe ngjarjet që i pasuan këto, ishin një fillim i errët edhe për arsimin shqip në Kosovë. Pushtet mbajtësit komunistë, pos largimit dhe burgosjes së shumë nxënësve dhe profesorëve, suspenduan dhe e larguan nga puna edhe Bardhin, drejtorin e Gjimnazit. Mirëpo, për fat, dashamirët e arsimit, e rikthejnë sërish Bardhin në punë, por tashmë në cilësinë e Këshilltarit për Arsim dhe Edukim, pranë Kuvendit Komunal. Në këtë detyrë qëndroi prej 1 nëntorit 1981 deri më 13 korrik 1984. Në periudhën prej 1 dhjetorit 1982 deri më 31 korrik 1983, ishte ushtrues detyre i Sekretarit të BVI-së komunale për arsim dhe edukim fillor, kurse prej 13 korrikut 1984 e deri më 31 korrik 1986, Inspektor i Arsimit. Edhe në këto pozita, roli i Bardhit për zhvillimin e arsimit shqip në komunë ishte e pamohueshme, sidomos në zgjerimin e rrjetit të shkollave. Bardhin e shohim edhe në aktivitetet e Takimeve të Veteranëve të Kosovës. 

Nga 1 tetori 1984 deri më 26 prill 1989, Bardhi ushtroi detyrën e Kryetarit të Organizatës së Luftëtarëve të Komunës së Deçanit. Në këtë cilësi, Bardhi ishte edhe anëtar i Kryesisë së Kuvendit Komunal dhe anëtar i Kryesisë së Komitetit Komunal të Deçanit. Këto detyra, i kryen edhe pas pensionimit prej 1 janarit 1987, kur ishte në prag të 68 vjetorit të lindjes. Shembja e autonomisë së Kosovës si dhe demonstratat e përgjakshme edhe në Deçan, do të jenë arsye e mjaftueshme që Kryesia e Komitetit Komunal të LK të Deçanit (në krye me Sali Çekun, kryetar, e ku Bardhi ishte anëtar), ndër të parët denoncojnë dhunën dhe krimet serbe ndaj shqiptarëve dhe ndër të parët lëshojnë radhët e Lidhjes së Komunistëve. Bardhi, merr pjesë në protestën e madhe të muajit prill 1989, në qendër të Deçanit. Më 26 prill 1989, Bardhi paraqet dorëheqje të parevokueshme nga Kryesia dhe nga posti i Kryetarit të Organizatës së Luftëtarëve të Deçanit, duke përfunduar një veprimtari të shquar afro 50 vjeçare si mësues, edukator, pedagog, profesor, historian, luftëtar në luftë dhe pas saj, deputet i Kuvendit të Kosovës, këshilltar dhe humanist.   

Për të gjitha këto kontribute, u shpërblye me shumë mirënjohje e dekorata, kurse në vitin 1984, është laureat i shpërblimit “Dita e Rinisë” dhënë nga BVI-ja për Arsim dhe Edukim e Kosovës, për arritje në lëmin e arsimit dhe të edukimit. 

Bardh Nitaj, pas një sëmundje të gjatë, ndërroi jetë, në banesën e tij, në Deçan, më 08 dhjetor 1995. U varros të nesërmen, në fshatin e tij të lindjes, në Dranoc, me nderimet e mijëra qytetarëve, që kishin ardhur t’i bëjnë nderimet e fundit – mësuesit të tyre të dashur.

Në ëndërr

Kujtoj që nuk është udhëtim nëpër kohë, më shumë më përngjan si kalim në një dimension tjetër, paralel. Natyrisht, jo fizikisht, por me mendje gjithsesi, e mua më duket edhe shpirtërisht. Sepse aty takoj ata që flenë në shpirtin tim. Edhe pse ka kohë që nuk janë mbi këtë dhe!... Janë bashkë dhe duket që kujdesen për njëri-tjetrin. Nuk janë shumë të lodhur, por të plakur gjithsesi. Nevojat nuk i shpërfaqin, duket se iu mjafton të qëndrojnë në votrën e vjetër, ku shpesh duan të na shohin bashkë - si dikur! Kthjellët i shoh dhe nuk ngurroj të çmallem me ta, duke i shtërnguar si asnjëherë më parë. Përqafim, që në dimensionin tonë rrallë ndodh. Bisedohet, por si në filmat pa zë, nuk regjistrohet në mbamendje asnjë fjalë. Por, ka shumë mall dhe dashuri pa kushte aty. Ka një ndjesi frike, pasi që dimensionet duket se, megjithatë nuk janë hermetikisht të murosura në mes vete. Vdekja, vjen si shkrepëtimë drithëruese duke dhënë sinjalin që ajo është duke ruajtur kufirin në mes këtyre dy botërave. Krejt pështjellueshëm dhe apriori e di që 'fundjava' disa sekondëshe po mbaron. Largimi nga votra e vjetër, duke lënë pjesët e shpirtit tënd aty si dy roje nderi, sjell shumë dhembje. Janë pothuajse të barabarta dhembja e ndarjes me lumturinë që sjell takimi me ta - në ëndërr!

Mendime të lira

********************************************************************

Liria nuk është absolute, ajo ka rregulla dhe kufinjë, përndryshe degradon në anarki dhe robëri! (s.n.) (23.04.2023)

********************************************************************

Betejat që zhvillohen pa zhurmë, mund të ndezin më shumë! (s.n.) (29.03.2023)

********************************************************************

E vërteta në kohë reale nuk është medoemos në sinkron me perceptimin që krijohet për të. Perceptimi ndodh me inercion, atëherë kur realiteti veç ka pësuar ndryshim! (s.n) (23.03.2023)

********************************************************************

Nëse të duhet, zëvendësoje 'të vjetrën' me 'të renë', por në vend që ta hudhësh në koshin e harresës, ruaje 'atë' në arkën e kujtesës! (s.n.) (22.12.2022)

********************************************************************

Si do t'i kujtojmë të vdekurit, kur po i harrojmë edhe të gjallët! (s.n.) (02.11.2022)

********************************************************************

As retë e dendura në qiell, as perdet e mbyllura në dritare, e as muret e trasha të qelive, nuk e ndalojnë diellin të lind çdo mëngjes! (s.n.) (11.04.2022)

********************************************************************

Mallin për të shkuarën, mundohu ta shuash me të tashmen, e cila po ashtu mund të të ik dhe një ditë edhe ajo të jetë veçse një e shkuar! (s.n.) (22.02.2022)

********************************************************************

Na kujtohet pothuajse gjithçka që nuk kemi bërë, përderisa harrojmë shumëçka që kemi bërë. A thua që mosveprimi të jetë më mbresëlënës se veprimi? (s.n.) (19.02.2022)

********************************************************************

Njerëzit duke qenë më shumë sipërfaqësor harrojnë të jenë edhe pak përmbajtësor. Kështu, për shembull ata më shumë kujdesen për mirëmbajtjen e trupit të tyre nga së jashtmi, duke anashkaluar shpeshherë funksionalitetin e tij nga së brendshmi. Të mos flasim pastaj që lënë pas dore krejtësisht kujdesin shpirtëror për veten e tyre. (s.n.) (30.01.2022)

********************************************************************

Dyshimi i njerëzve për efektivitetin e vaksinave edhe mund të këtë për bazë panjohuritë shkencore të tyre, por paradoksi qëndron kur shkenca dyshon në (pa)mjaftueshmërinë e imunitetit natyror tek njerëzit! (s.n.) (23.01.2022)

********************************************************************

Që të mund të mbajmë kursin në rrugëtimin drejt së ardhmes, ndonjëherë na duhet që shpirtin ta ushqejmë me kujtimet e së shkuarës e trupin me ushqimet e së tashmes. (s.n.) (19.01.2022)

********************************************************************

Gabimet e mjekëve i mbulon dheu, e për gabime të mësuesve kemi mjekë të gabuar. (s.n.) (16.01.2022)

********************************************************************

Kthesa jetike në zhvillimin e shoqërisë njerëzore ishte shkollimi. E ngjashme me mungesën e shkollimit, është degradimi i tij! (s.n.) (15.01.2022)

********************************************************************

Politikanët, njëkohësisht janë mbamendësit dhe harrestarët më të mëdhenj! Përderisa, pothuajse harrojnë se kush ishin, nga vinin e çfarë thanë, deri në hakmarrje mbajnë në mendje çdo pengesë e çdo gjë që u doli përballë drejt ngritjes së tyre. (s.n.) (14.01.2022)

********************************************************************

Jeta është një udhëtim me një drejtim. Edhe kur vendnumërojmë, jemi duke udhëtuar në kohë. Vetëm kthim prapa s'ka! (s.n.) (07.01.2022)

********************************************************************

Të bazuarit në të dhënat shkencore, nuk të japin vetëm mundësinë e analizës (konstatimit të gjendjes) por edhe të sintezës (parashikimit dhe ideimit të zgjidhjeve). (s.n.) (27.12.2021)

********************************************************************

Jo veç gjuhësisht, por edhe praktikisht, secila paMUNDËSI është një lloj s(ë)MUNDJE! (s.n.) (18.12.2021)

********************************************************************

Të gjallët, vështirë ta faktojnë historinë e së kaluarës. Në rastin e kundërt, të një udhëtimi ajnshtajnian pas në kohë, t'u tregosh historinë e së tashmes atyre që nuk jetojnë më, vështirë ta besojnë! (s.n.) (08.12.2021)

********************************************************************

Jo rrallë, mimika e fytyrës është një pasqyrim i gjendjes shpirtërore! (s.n.) (22.11.2021)

********************************************************************

Pa vullnetin e tyre, njerëzit me individualitet udhëhiqen nga njerëzit e turmave. (s.n.) (13.11.2021)

********************************************************************

Këmbanat e zgjimit dhe ngritjes së vetëdijes mbarëkombëtare, do të duhej të bien pa u ndalur, orë e çast, e kundërta vlen: 'uji fle, anmiku nuk fle'! (s.n.) (25.09.2021)

********************************************************************

Në politikë, më mirë pa opozitë se sa me një kuazi-oponencë. (s.n.) (24.09.2021)

********************************************************************

Sado të hapura gjithandej, degët e një peme ushqehen nga rrënjët e të njëjtit trung. Ndonjë degë që shkon shumë më larg, edhe mund të thyhet e të mos jetë më pjesë e pemës! (s.n.) (03.09.2021)

********************************************************************

Errësira dhe qetësia janë sinonime të vdekjes, prandaj bëj dritë dhe thyej heshtjen, që të ndjehet jeta! (s.n.) (31.08.2021)

********************************************************************

Vaji i fëmijëve tingëllon njëlloj kudo në botë. Edhe të qeshurat e tyre po ashtu. Bashkëndje me dhembjen e vuajtjen e tyre dhe bëj që buzëqeshja t'u kthehet në fytyrat e tyre të njoma! Bëje botën më të lumtur! (s.n.) (22.08.2021)

********************************************************************

Çdo i vaksinuar përballë infeksionit me virus ngjan me një rrufepritës përballë një zbrazjeje atmosferike. Sa më shumë të tillë që ka, përfitohet një zonë mbrojtëse efikase dhe e sigurt për të gjithë. (s.n.) (24.07.2021)

********************************************************************

Jetojmë në ëndrrat e së shkuarës, përderisa ajo që ka kaluar na përngjan si një ëndërr. (s.n.) (04.06.2021)

********************************************************************

Fëmijët janë gjurmët që duhet ndjekur për një të ardhme më të lumtur në botë! (s.n.) (27.02.2021)

********************************************************************

Familja është si një diamant, me një fortësi shkëmbi e shkëlqim hyjnor, e që mbahet nga dashuria. (s.n.) (27.01.2021)

********************************************************************

Sidomos për një shoqëri në tranzicion, njëlloj është e dëmshme si mospjesëmarrja në votime, ashtu edhe mungesa e një aktivizmi politik të të gjithë komunitetit. Nuk guxohet të lihet fati i të gjithëve në duart e vetëm një grupi njerëzish, që jo rrallë herë synojnë politikën si mjet arritjeje qëllimesh të tyre të ngushta a klanore! (s.n.) (16.01.2021)

********************************************************************

Sa më shumë që po rritet njerëzimi, aq më shumë njeriu po ndjehet më i vetmuar!... (s.n.) (08.01.2021)

********************************************************************

Vlerësoje të djeshmen dhe nxjerr mësimet e duhura ashtu që e nesërmja mos ta ndjej të nevojshme të të gjykoj për veprimet që i bën sot! (s.n.) (11.11.2020)

********************************************************************

Njeriun, asgjë nuk e ruan më mirë nga të bëmat e tij, se sa ndërgjegjja e tij, nëse e ka. (s.n.) (01.11.2020)

********************************************************************

Një qëllim madhor duhet të të jap kurajën që të mos dorëzohesh përpara asnjë ligësie a motivi të ulët. (s.n.) (31.10.2020)

********************************************************************

Ndjehu keq dhe kërko falje, jo vetëm për premtimet e papërmbushura por edhe për mundësitë për vepra të mira që ke pasur, por që nuk i bëre dot! (s.n.) (25.01.2020)

********************************************************************
Jeta, më parë se të jetë një dhuratë, është një mision. Çështja është se me sa devotshmëri do ta luajmë rolin tonë në këtë mision. (s.n.) (05.01.2020)
********************************************************************
Pothuajse të humbin fjalët, kur mendon së gjithçka të është ose e njohur ose e pamundur. (s.n.) (30.12.2019)
********************************************************************
Fëmijë mund të mbetesh për tërë jetën, nëse ia del që duke u rritur, shpirtin tënd të mos e bësh strehë të djallit. (s.n.) (23.11.2019)
********************************************************************
Sa më shumë që zotëroja rrahjen e tasteve të kompjuterit, aq më pak praktikoja lapsin dhe bukurshkrimin. 💻vs.✏(s.n.) (09.11.2019)
********************************************************************
Kur isha më i ri, e dëgjoja më ëndje muzikën e vjetër që atëherë ishte e kohës, e tash që po plakem nuk e ndjej më njëlloj muzikën e kohës që tashmë është e re. 🎶🎼🎧📻🔊 (s.n.) (09.10.2019)
********************************************************************
Zëre çastin, e pastaj jeto me aromën e nektarit të tij. (s.n.) (20.08.2019)
********************************************************************
Ndonjëherë gjatë ecjes jetësore, të bën mirë të ndalosh e të kthesh kokën prapa. Kështu, duke krahasuar të kaluarën me të tashmen, mund të gjykosh se deri ku ke mbërritur si dhe mund të vlerësosh se sa larg qëndron nga kulmet e arritjeve të synuara jetësore. (s.n.) (09.08.2019)
********************************************************************
Jo gjithnjë të të ngazëllejë një buzëqeshje e bardhë, por as të të mërzisë një mimikë e ngrysur! Kjo e fundit mund të jetë duke u merakosur për ty, për dallim nga e para e cila mund të jetë duke u zgërdhyer me ty! (s.n) (24.07.2019)
********************************************************************
Edhe e kaluara sado e lavdishme të ishte, fillon e zbehet kur e tanishmja është e ngrysur! (s.n.) (29.06.2019)
********************************************************************
Kur ndodhi Shpërthimi i Madh, nga energjia pafundësisht e madhe, u krijua materia. Pra, i bie që e para ishte idea! (s.n.) (30.05.2019)
********************************************************************
Këndi prej kah vështron njeriu është unik, prandaj ai ka unin e tij, mendimin dhe veprimin e tij, botëkuptimin e tij. (s.n.) (12.05.2019)
********************************************************************
Asgjë e keqe nuk pritet të të ndodh nëse nuk e bën një të keqe!... (s.n.) (03.05.2019)
********************************************************************
Shteti ashtu si familja mund të degradoj, kur 'të zotët' trajtojnë vetëm vetën e tyre! (s.n.) (24.04.2019)
********************************************************************
Dashuria dhe urrejtja nuk qëndrojnë shumë larg njëra tjetrës. Si një binom, ato janë anët e kundërta të së njëjtës medalje. (s.n.) (23.04.2019)
********************************************************************
Sfidë dhe arritje e veçantë në jetë është kur gjërave që kanë vajtur keq, mund t'ju japësh një epilog të suksesshëm. (s.n.) (13.04.2019)
********************************************************************
I vetmi antidot që mund të shuaj helmin që nxjerr urrejtja, është dashuria! (s.n.) (26.03.2019)
********************************************************************
Jeta çdo ditë na jep mësime, por ne vështirë t'ua nxjerrim kuptimin. (s.n.) (13.03.2019)
********************************************************************
Kjo tokë që na mban e na ushqen, e prej së cilës të gjithë ruhemi të mos përbaltemi! Çfarë përbuzje ironike! (s.n.) (08.03.2019)
********************************************************************
Rrethanat nuk të përshtaten ty, ti duhet t'ju përshtatesh atyre. (s.n.) (02.02.2019)
********************************************************************
Një prej instrumenteve matëse të demokracive të zhvilluara, përpos zgjedhjeve të lira, fjalës së lirë etj., është edhe organizimi sindikal i të gjitha kategorive të punëmarrësve. Ndërsa, për cilësinë e rezultateve të punëve, kujdesen punëdhënësit, duke siguruar ambient me të gjithë parametrat e nevojshëm. Në një vend funksional, gjithsecili kryen detyrën sipas roleve që mbart! Suksesi i matur me nivel performance, e i bazuar në ngritje dhe përvojë profesionale, do të jetë kriter për shpërblim. (s.n.) (21.01.2019)
********************************************************************
Gjithsecili bart rolin kryesor në filmin e jetës së tij. (s.n.) (06.12.2018)
********************************************************************
Përderisa institucionet e dijes do të duhej të ideonin, projektonin dhe ndërtonin rrugët e së ardhmes, institucionet qeveritare do të duhej të zbatonin ato politika, rezultatet e të cilave do të ishin të prekshme në kohën aktuale, në kuptimin sa më cilësor, për gjithsecilin. Në të kundërten, çdo mosfunksionim i tillë apo përzierje e roleve, do të kishte për pasojë një shthurje totale në shoqëri deri në depresion kolektiv, si dhe shuarje të ëndrrave për një të ardhme më të ndritur! (s.n) (04.12.2018)
********************************************************************

E keqja e ka kapluar këtë botë, si një ortek që vjen e rritet. Gjithçka e shkapërderdhur, gjithandej! (s.n.) (30.09.2018)
********************************************************************
Ti edhe mund t’i kesh fituar betejat më radhë, por të kesh humbur luftën në fund. (s.n.) (02.09.2018)
********************************************************************
Shprehja e ndjesive të theksuara vjen në pah si rezultat i njohurive të pamjaftueshme të thellësisë së gjërave. (s.n.) (04.08.2018)
********************************************************************
Gjërat e shtrenjta nuk kanë çmim dhe nuk blihen. Ato ose fitohen nga sakrifica ose dhurohen nga dashuria. (s.n.) (17.07.2018)
********************************************************************
Ekonomia dhe rrjedhimisht e ardhmja e një vendi është e pashpresë atëherë kur bankat u ofrojnë bizneseve kredi me kamata të larta, përderisa depozitat “shpërblehen” pothuajse me zero normë të interesit. (s.n.) (14.07.2018)
********************************************************************
Njerëzit e mëdhenj ashtu si meteorë, pasi që kryejnë misionin, sikur shpejtojnë të ikin duke lënë pas veprën e tyre si gjurmën që shndrit. (s.n.) (11.06.2018)
********************************************************************
Të gjallët duhet vazhduar së jetuari edhe për të mos u vyshkur kujtimi për të vdekurit! (s.n.) (10.06.2018)
********************************************************************
Një gjë është e sigurt, se edhe në të kaluarën sado të largët, jeta ka qenë me ngjyra! (s.n.) (15.05.2018)
********************************************************************
I kemi parë vet, kur hienat në tufë ua merrnin prenë disa luanëve! (s.n.) (25.04.2018)
********************************************************************
Fjala e urtë popullore duke qenë aq e vjetër dhe e skalitur nëpër kohë, rezonon aq pa lëkundshëm, sa që duket të jetë e shenjtë, si të ishte fjalë e Perëndisë. (s.n.) (20.04.2018)
********************************************************************
Kush nuk mëson nga historia, ajo do t'i riprovojë duke iu përsëritur si një spirale e Arkimedit! (s.n.) (03.04.2018)
********************************************************************
Orteku i pangopësisë rrezikon seriozisht racën njerëzore! (s.n) (30.03.2018)
********************************************************************
Të mësosh nuk është luks, por pastaj të bëhesh i ditur është privilegj. (s.n.) (14.02.2018)
********************************************************************
Njëlloj është e rrezikshme, si arma në dorën e një vrasësi, si lapsi në dorën e një injoranti. (s.n.) (02.02.2018)
********************************************************************
I dashur njeri, kjo botë ka ekzistuar edhe para se të vije ti, e do të vazhdoj të ekzistoj edhe pasi ti të mos jesh. Prandaj, merre shtruar dhe me qetësi dhe jetoje njerëzisht episodin e jetës që të është dedikuar. (s.n.) (05.12.2017)
********************************************************************

Përderisa optimisti e imagjinon një dritë në fund të tunelit, pesimisti ngutet t’ia fik atë. (s.n.) (25.11.2017)

********************************************************************
Populli është arma, me votën e të cilit arrihet në pushtet, prandaj, lamtumirë popull deri në katërvjeçarin e ardhshëm! (s.n.) (23.11.2017)
********************************************************************

Dhembja ngjason me hijen. Kudo që të ikësh, ajo të vjen pas. (s.n.) (17.11.2017)

********************************************************************

Koha është relative. Ndonjëherë disa momente lejnë gjurmë më shumë se sa vitet, e ndonjëherë vitet na ikin pa i vënë re. (s.n.) (17.11.2017)

********************************************************************

E pabesueshme, por më të gjallë janë disa të vdekur. E dhembshme, kur më të vdekur janë disa të gjallë! (s.n.) (11.11.2017)
********************************************************************
Koha paraqet një trajektore sekuencash diskontinuale të raportit në mes të materies dhe lëvizjes. (s.n.) (07.11.2017)
********************************************************************
Jo shumë kohë më parë, e ëndërronim lirinë, ndërsa sot e kuptojmë se liria është nocion relativ, kompleks dhe shumëdimensional. Sido që të jetë, liria e individit duhet të shtrihet deri në atë masë, ku nuk fillon të cenohet liria e tjetrit. (s.n.) (15.09.2017)
********************************************************************
Mos nis ditën e re me hidhërimin e vjetër, sepse dita e re sjell shans të re. (s.n.) (08.09.2017)
********************************************************************
Nëse kjo botë dhe jeta në të është një shfaqje hyjnore, e pavarësisht se a kemi të bëjmë me premierë apo reprizë, atëherë skenari edhe mund të jetë shkruar deri në detaje apo thjesht gjithçka zhvillohet e pa determinuar brenda një kornize saktësisht të definuar me mundësi të ndërhyrjeve në raste. (s.n.) (27.07.2017)
********************************************************************
Janë dy kategori njerëzish, politikanët dhe ne. (s.n.) (10.06.2017)
********************************************************************
Kur tradhtia lind në besatim, ti më kot e kërkon njeriun. (s.n.) (01.06.2017)
********************************************************************
Ngritjet dhe rëniet në jetë ngjasojnë me ngjitjet dhe zbritjet nga shkallët. Të lodhshme janë ngjitjet shkallëve, e krejt lehtësisht zbresim nga to. Prandaj, përqendrimi më i madh duhet të jetë kur të kemi arritur majat. Fare lehtë, jeta mund të na rrokullisë teposhtë! (s.n.) (28.05.2017)
********************************************************************
Geocentrikët shihnin botën si qendër të sistemit planetar, ndërsa mediokrët shohin botën të lëviz rreth tyre. (s.n.) (24.05.2017)
********************************************************************
Njeriu jeton edhe për aq kohë sa ka kush e kujton atë. (s.n.) (14.05.2017)
********************************************************************
Jeta është luftë, lufto! (s.n.) (07.05.2017)
********************************************************************
Nëse duhet zgjedhur, në rastin më të keq, më e pranueshme do të ishte një diktaturë se sa një anarki. Së paku, faji do të kishte emër dhe adresë! (s.n.) (25.04.2017)
********************************************************************
Duke qenë se njeriu është pjesë integrale e natyrës, atëherë çdo veprim i tij është i natyrshëm. (s.n.) (19.03.2017)
********************************************************************
Shfaqja e vetme në të cilën të gjithë njerëzit sillen pa u pyetur, jo vetëm për të shikuar por edhe për të luajtur pjesën e tyre, e megjithatë asnjëri nuk do ta lëshon skenën e amfiteatrit sado dramatike të jenë duke u zhvilluar ngjarjet në të, është jeta. (s.n.) (16.03.2017)
********************************************************************
Labirint që përfundon në kurth është jeta. (s.n.) (28.02.2017)
********************************************************************
Jetoje vetëm jetën tënde, pa e dëmtuar lirinë dhe të drejtën e tjetrit. Lëri më shumë hapësirë Zotit, të bëj punën e Tij! Bota është strehë e mjaftueshme për të gjithë. Mjafton të mbulohet me petkun e dashurisë! Para se të bëhesh i ligë, mos harro të kujtohesh se edhe makina jote një ditë do të shuhet! Pas të mirit dhe të ligut do të mbetën vetëm kujtimet, të cilat nuk do të mund të shlyhen ndër breza!... (s.n) (24.02.2017)
********************************************************************
Në jetë ndodh plot herë që të lëkundesh me shumë mëdyshje për të vazhduar në rrugën që ti mendon se është më e drejta. Mirëpo, pavarësisht, se do të të shfaqen pengesa serioze, ti, asnjëherë mos ndalo që të plotësosh kohën tënde të shenjtë të jetës, e cila të është dedikuar. Mund të ndodh që rrethanat të ndryshojnë aq shumë, të tilla që të duket se je zbritur papritur në Tokë nga askundi, por, fakti që ti vazhdon të jesh akoma në jetë, është sinjal i sigurt që duhet të vazhdosh rrugëtimin tënd. Mos të të ndaloj dëshpërimi, braktisja, vështirësia e çastit. Çdo gjë ka zanafillë dhe fund. Mos lejo të të diktoj tjetri fundin! Përballo, me qetësi hyjnore, sikur gëzimin, edhe vuajtjen, pikëllimin, dhembjen. Ti mund të mos e besosh, por me besim, ti mund të gjesh edhe qëllimin e rrugëtimit tënd. Është dikush dhe diçka që do të të qëndroj aq afër, brenda teje, sa do të të lehtësoj dhe ndriçoj rrugëtimin tënd. Dikush që do të gëzohet si fëmijë, që ti do ta pranosh për dritë të syve tu’. Si prindi që i gëzohet dashurisë kthyese të fëmijës së tij... (s.n.) (05.02.2017)
********************************************************************
Hipokrizia ekstremisht e çmendur e njeriut në pushtet ndodh kur tentohet që fati i tij i lëkundur të ndryshohet duke e pështjelluar atë me fatin kolektiv duke nxitur lëkundje të mëdha dhe për më keq duke provuar të përfitoj duke ri-shkruar dhe vulosur emrin e tij në histori! Kështu ka ndodhur gjithnjë gjatë tërë historisë njerëzore dhe e tillë mbetet pritshmëria edhe për të tashmen dhe të ardhmen!... (s.n.) (24.01.2017)
********************************************************************
Historia nuk është gjë tjetër pos përmbledhje e biografive të njerëzve të mëdhenj, të tjerët janë thjesht numra. Nisur nga kjo, udhëheqësit e shteteve të fuqishme edhe mund të shënojnë epokë në histori - për të mirë a për të keq. Njerëzit e thjeshtë që paraqesin numrat në faqet e historisë, edhe mund të nuhasin ardhjen e këtyre epokave - dhe demonstrojnë! Jo gjithmonë, një epokë e re ka sjellë dritë dhe shpresë!... (s.n.) (20.01.2017)
********************************************************************
Në fakt, ne bashkëjetojmë çdo ditë me zombit! Ata janë kudo, rreth dhe mes nesh! Mjafton, të ndiqen edicionet e lajmeve dhe të bindemi për këtë!... (s.n.) (25.12.2016)
********************************************************************

Koha është relative. Ndonjëherë disa momente lejnë gjurmë më shumë se sa vitet, e ndonjëherë vitet na ikin pa i vënë re. (s.n.) (17.11.2016)
********************************************************************
Mos lejo pleqërinë, te të pyet se ku e pate rininë! (s.n.) (14.11.2016)
********************************************************************
Nuk je rritur, nëse ke zvogëluar tjetrin! (s.n.) (07.10.2016)
********************************************************************
Ne, kur lutemi ashtu në ndërdije, që planeti ynë të mos goditet nga trupa qiellorë pa orbitë, harrojmë fare të lutemi edhe për Hënën, pa të cilën nuk do të ekzistonte as Toka! Toka dhe Hëna jetojnë në çift, në harmoni të plotë. Në këtë mënyrë ato kanë mbijetuar deri tani!... Mos të harrojmë, kur të lutemi për veten, të ndajmë një copëz lutje edhe për Atë tjetrin, pa të cilin jeta do të ishte e zbrazët, siç është e zbraztë edhe pjesa më e madhe e qiellit!... (s.n.) (03.10.2016)
********************************************************************
Pa u zhytur në filozofinë e Pse-së së madhe për ekzistencën e botës që e prekim dhe e ndjejmë, si dhe duke e marrë për të qenë maksimën: "Mendoj, prandaj ekzistoj!", nuk ka dyshim se çdo veprim i ynë, do të hedhet në aksin e lokomotivës kohore, ashtu që efekti i tij të mund të përballoj sa më shumë nga ky rrugëtim, edhe atëherë kur ne, fizikisht, nuk do të mund të jemi bashkudhëtar me të, ani pse, ndoshta shpirtërorja do të donte të kthente mbrapsht në aks, për të bërë ndonjë korrigjim eventual!... (s.n.) (18.09.2016)
********************************************************************
Historia nuk është gjë tjetër veç se përmbledhje e biografive të njerëzve të mëdhenj. Të tjerët janë thjesht numra. (s.n.) (15.09.2016)
********************************************************************
Trungu mund të rrëzohet, por rrënjët mbesin! (s.n.) (01.09.2016)
********************************************************************
E vërteta?... Secili ka versionin e tij!... (s.n.) (30.07.2016)
********************************************************************
Sa të vështirë janë njerëzit. Për t'iu drejtuar atyre shpesh duhet përdorë "vegla" analoge si To, Cc apo Bcc. Për dallim nga kur i drejtohemi Krijuesit tonë - në mënyrë të drejtpërdrejtë dhe pavarësisht gjithçkaje! Faleminderit o Zot! (sn) (25.07.2016)
********************************************************************
Ndonjëherë duhet të vraposh që të mësosh të ecësh! (s.n.) (12.02.2016)
********************************************************************
Me ty, si pa ty! Por, pa ty?!... (s.n.) (24.01.2016)
********************************************************************
Në ballafaqimin triumfues me kundërshtarin, gjithmonë lej një shteg hapur, në mënyrë që ai të mund të dali faqebardhë nga ajo humbje! (s.n.) (14.01.2016)
********************************************************************
Ndaj njerëzve të mëdhenj duhet sjellur si ndaj zjarrit, nuk u duhet qëndruar shumë larg se do të mërdhish, por as shumë afër se do të djegësh! (s.n.) (09.01.2016)
********************************************************************
Dikujt as në akull nuk i rrëshqasin këpucët. (s.n.) (17.12.2015)
********************************************************************
Bota është marrëdhënie e të kundërtave. (s.n.) (02.12.2015)
********************************************************************
Koha e kërkon njeriun në flakë. (s.n.) (01.12.2015)
********************************************************************
Nëse je vegjetarian, përse ua ha ushqimin kafshëve? (s.n.) (18.11.2015)
********************************************************************
Askujt nuk i dhurova jetë, që t'i jap vetës të drejtë t'i marr dikujt! (s.n.) (14.11.2015)
********************************************************************
Dy vdekje s'janë, e njërës s'mund t'i ikësh! (s.n.) (13.09.2015)
********************************************************************
Jeta është një labirint! Kur të të mbyllet një portë, mos u dorëzo, ka plot të tjera që janë të hapura! Ti vetëm duhet t'i gjesh! (s.n.) (18.07.2015)
********************************************************************
Kalojmë çdo ditë të jetës, njërën pas tjetrës, duke u përpjekur për një të ardhme, por, vetëm të kaluarën e kemi në pronësi. (s.n.) (18.05.2015)
********************************************************************
Vetëm për faktin se mund të flasësh, nuk do të thotë që medoemos edhe duhet të flasësh! (s.n.) (09.04.2015)
********************************************************************
Dashuria zvogëlon vdekjen! (s.n.) (26.03.2015)
********************************************************************
Gazetari, gjysmën e karrierës së tij profesionale e kalon duke shkruar për gjëra që nuk i di mirë, kurse gjysmën tjetër e kalon duke mos shkruar për gjëra që i di fort mirë! (s.n.) (12.11.2014)
********************************************************************
Në kohëra të padrejta, korrigjohen "padrejtësitë" që janë bërë në kohëra të drejta. (s.n.) (27.04.2014)
********************************************************************
Kur reflektoni pozitivizëm, edhe absorboni pozitivizëm. (s.n.) (26.01.2014)
********************************************************************
Ndonjëherë duhet pasur frikë nga dëshirat e mëdha, sepse ka të ngjarë që ato një ditë të realizohen!... (s.n.) (04.09.2013)
********************************************************************
Koha i shëron plagët, por kur plaga është e madhe, koha është oksigjeni i saj!... (s.n.) (13.10.2012)
********************************************************************
Nëse Djalli është këtu, duhet të ekzistojë edhe Zoti! (s.n.) (30.09.2012)
********************************************************************

Manastiri i Deçanit dhe Gjykata Kushtetuese

Manastiri i Deçanit, rikthen pronat duke iu falënderuar Gjykatës Kushtetuese te Kosovës, e cila kur liston një Përmbledhje kronologjike te fakteve (AKTGJYKIM ne rastin nr. KI132/15, dt. Prishtine, me 20 maj 2016):

• 20. Me 28 qershor 1946, duke u bazuar ne paragrafin 2, neni 18 i Ligjit mbi Reformen Agrare dhe Kolonizimin te Brendshem te Serbise, "Keshilli Ekzekutiv Popullor i Rrethit per Kosove e Metohi", me seli ne Prizren, i Republikes Socialiste Federative te Jugosllavise se atehershme, nxori Vendimin Uf. 2649, duke i shpronesuar parashtruesit te kerkeses disa ngastra toke.
• 21. Me 5 nentor 1997, Qeveria e Republikes se Serbise lidhi Marreveshje mbi Dhurimin, Uf. 04 Uf. 464-2914-97, me parashtruesin e kerkeses. Me kete Marreveshje mbi Dhurimin, nje pjese e tokes se konfiskuar iu kthye parashtruesit te kerkeses dhe u regjistrua ne kadaster me numer 464-2914/97.

- do të duhej të merrte në konsideratë edhe faktet e pamohueshme të radhës:

RREGULLORE NR. 1999/1

UNMIK/RREG/1999/1

25 qershor 1999

PËR AUTORIZIMET E ADMINISTRATËS SË PËRKOHSHME NË KOSOVË

Neni 2

RESPEKTIMI I STANDARDEVE TË PRANUARA NDËRKOMBËTARE

Të gjithë personat që marrin përsipër detyra publike ose mbajnë funksione publike në Kosovë, gjatë ushtrimit të funksioneve të tyre duhet t’i respektojnë standardet e pranuara ndërkombëtare të të drejtave të njeriut dhe të mos diskriminojnë asnjë person për shkak të gjinisë, racës, ngjyrës, gjuhës, fesë, bindjes politike ose bindjeve të tjera, origjinës kombëtare, etnike apo sociale, shoqërimit me një komunitet kombëtar, pasurisë, lindjes ose të ndonjë statusi tjetër.

Neni 3

LIGJI NË FUQI NË KOSOVË

Ligjet e Kosovës të cilat kanë qenë në fuqi në territorin e saj para datës 24 mars 1999 do të vazhdojnë të zbatohen në Kosovë nëse nuk bien në kundërshtim me standardet e përmendura në nenin 2, me përmbushjen e mandatit të dhënë UNMIK-ut me Rezolutën 1244 (1999) të Këshillit të Sigurimit të Kombeve të Bashkuara ose me këtë rregullore a çdo rregullore tjetër të nxjerrë nga UNMIK-u.

Efekti konkret i Neneve 2 dhe 3, është zhvleftësimi i të gjitha Ligjeve diskriminuese të Serbisë, në raport me Kosovën, gjatë periudhës së dhunimit të Autonomisë së Kosovës. Kjo fuqizohet edhe më shumë me:

RREGULLORE NR. 1999/24

UNMIK/RREG/1999/24

12 dhjetor 1999

PËR LIGJIN NË FUQI NË KOSOVË

Neni 1

LIGJI NË FUQI

1.1 Ligji në fuqi në Kosovë përfshin:

(a) Rregulloret e shpallura nga Përfaqësuesi Special i Sekretarit të Përgjithshëm dhe instrumentet ndihmëse të nxjerra në përputhje me to dhe
(b) Legjislacionin në fuqi në Kosovë më 22 mars 1989.

"Në kohëra të padrejta, korrigjohen "padrejtësitë" që janë bërë në kohëra të drejta." (s.n.)

Prishtinë, 21 Maj 2016

BE-ja dhe Kosova

Naivitet politik është të mendohet dhe të besohet se BE-ja nuk do ta pranojë në gjirin e saj Serbinë, vetëm për shkakun se ajo ka tema të hapura me Kosovën. Mos të harrohet fakti se në BE është edhe Qiproja (pjesa greke) dhe kështu i bie se ajo (BE-ja) një pjesë të territorit të saj (pjesën turke të Qipros) e ka të kontestuar, por ajo se ka aspak problem këtë gjë. Edhe Bullgaria dhe Rumania janë pranuar në BE pa i plotësuar kriteret, ka mjaftuar vetëm kriteri kryesor - ai politik. Pra, nëse BE-së i intereson ta këtë brenda vetes - Serbinë, për motive politike, ajo (BE-ja) do t'i anashkalojë temat e hapura që i ka Serbia me Kosovën. Aq më parë, kur tashmë janë hedhur firmat iniciale dhe të plota, në shumë marrëveshje trepalëshe, e që do t'i faturohen si sukses dhe plotësim kriteresh - Serbisë. Kosova, me apo pa të drejtë, do të mbetet edhe për një kohë të ëndërrojë për Evropën!...

Prishtinë, 08 Mars 2016

Treni eksperimentues

Ky janar siç duket, jo veç po shënon fillimin e një viti tjetër të ri, por më shumë se kaq po duket se po qartëson lëvizjet e reja të pritura jo pa droje në skenën politike në përgjithësi. Bashkimi Evropian pa Britaninë në te dhe tranzicioni më i papritur dhe më i paparashikueshëm ndonjëherë në ShBA, si duket ka shtuar apetitet sllave për të provuar mësyemjen në Kosovë. Nuk thuhet kot se "krimineli gjithmonë kthehet në vendin e krimit". Alarmi i rrezikut mendoj që duhet ndezur në rrafshin mbarëkombëtar. Bota do të kaloi në faza të reja e të paqarta e ndoshta shumë të rrezikshme, prandaj shqiptarët, jo vetëm në Kosovë, duhet ta ndjejnë këtë rrezik dhe vërtet të jenë si asnjëherë më parë të vetëdijshëm se pa qenë të bashkuar, vështirë do të përballen me sfidat që po pergatiten. Historikisht, pozicionimi i gabueshëm ka sjellë pasoja të rënda. Prandaj, më shumë se sa mbështetja tek aleatët përendimor, më e fuqishme do të jetë mbështetja tek bashkimi dhe reagimi si një komb i vetëm. Zhvillimet në vazhdim nuk do të duhej të na gjenin të befasuar. Megjithatë treni i provokimeve ka lëvizur në kohën e vlimeve të mëdha në botë, e koha për ndërtimin e një strategjie mbarëkombëtare - pothuajse e skaduar. Do ta zëmë, ne, trenin tonë?!...

Prishtinë, 14.01.2017

Megjithatë këpucët rrëshqasin

Kohë më parë pata thënë: "Dikujt as në akull nuk i rrëshqasin këpucët", mirëpo, sot, kur bora e parë po zbardhte natyrën dhe të ftohtit e acartë po ngrinte gjithçka para vetës, kjo thënie fitoi edhe një dimension të ri kuptimi. Këpucët e pjesëtarit të Forcës së Sigurisë së Kosovës (FSK) sot nuk bënin. Ato nuk përballonin dot një ngricë rruge të mëngjesit, nuk ishin të dimensionuara për këtë prag-dimri. E i gjori ushtar, e ka të pamundur të mos rrëzohet dy a tre herë brenda dy-treqind metrave rrugë, kur po shkonte këtë mëngjes për në detyrën që e priste. Si do të arrijë ky djalë i ri i Forcës sonë t'i zbatoj detyrat që i jepen, me këto këpucë? A thua edhe eprorët e tij mbajnë këpucë të tilla? Po, le të më thotë dikush, nëse kryetarë, qeveritarë, deputetë, drejtorë e udhëheqës tjerë rrëzohen rrugëve dhe trotuareve tona kur mësyjnë vend-punimet e tyre, sepse këpucët e tyre nuk bëjnë për ditë të ftohta e me ngrica!... Nuk do të shkruaja, sepse këtu, në Kosovën time, për të arritur ngushëllimin shpirtëror e moral, duhet që kudo që lëvizim, të mbajmë laps migjenian që të hedhim mbi letër të bardhë të gjitha të zezat që i hasim në përditshmërinë tonë. Mirëpo, ishte për keqardhje deri në dëshpërim, kur sheh ushtarin tënd që rrëzohet disa herë para syve tu për shkak të këpucëve që nuk bëjnë. Në një ditë si kjo, unë si qytetar duhej të shihja ushtarin të bënte hapa të guximshëm, me këpucë adekuate, duke ndihmuar njerëzit kalimtarë në nevojë!...

Pa u zgjatur, me dëshpërim të thellë, dyshoj që kjo klasë politike ka interes dhe synim forcimin e Forcës dhe shndërrimin e saj në Ushtri!...

Prishtinë, 29 Nëntor 2016